Salamat Kagurangnan sa saimong pag-antabay, Ika an samong sarigan sa gabos na bagay. Salamat Ina, Nuestra Señora de Salvacion, sa saimong mabagsikon na pag-ampon.
Salamat sa mga autoridad asin gabos na nakisumaro, bendicioni an saindang mga esfuerzo, rayoa sinda sa kapahamakan, asin pabungaha an saindang paglingkod nin dakul pang karahayan.
Sa pag-agi kan makusog na bagyo, Kagurangnan, hare pagpabayae an mga nagin biktima kaini, pakusoga sinda kan Saimong pagkamoot tanganing, pano nin paglaom, makabangon tulos sa kahorasaan.
Padagos Mo kaming antabayan na magtalubo na magin mga responsableng paraataman kan Saimong linalang, asin mga matinabang na parasurog sa kapwang nangangaipo.
Huli ki Kristo, samong Kagurangnan. Amen.
Nstra. Sra. de Salvacion, ipamibi mo kami.
Tags:
Prayer